Охрид, 3. октомври 2025 (ИНПРЕС) – Со чесност, работа и истрајност да продолжиме да го градиме Охрид, порача на денесшната прес конференција носителот на советничката листа од ВМРО-ДПМНЕ и Коалицијата „Твоја Македонија“ за претстојните локални избори, Перчо Божиновски.
Заложбата на Советот на Општина Охрид и советниците ќе биде поддршка на 10 приоритетни проекти за општината како дел од програмата на идниот градоначалник Кирил Пецаков – модерна општинска инфраструктура, локална стратегија за економски силна општина, општината во дигитална ера, инвестираме во спорт и во здрави навики, зелена, чиста и енергетски ефикасна општина, поддршка и промоција на локалниот туризам, културата и културните настани, како и реализација на вистинските идеи од охриѓани за добробит на сите, рече Божиновски.
– Ова е избор дали ќе останеме исправени и ќе одиме напред или ќе дозволиме да не вратат назад, таму каде што се губеше надежта и се рушеше довербата. За победа уште во првиот круг на Кирил Пецаков и освојување на мнозинството во Советот на Општината. Со чесност, со работа и со истрајност. Времето на Охрид и Македонија допрва доаѓа, потенцира Божиновски.
Истакна дека претендентите за советничко столче кои се дел од листата на ВМРО-ДПМНЕ и Коалицијата „Твоја Македонија“ се чесни, вредни и посветени луѓе кои работат за доброто на Охрид и охриѓани, кои не ветуваат чуда, туку макотрпна работа и одговорност. (Крај)
извор: ИнПрес фото: архива
