Охрид, 18. август 2025 (ИНПРЕС) – Популарните охриѓани Броз и Марама, како што беше најавено, ќе настапат на 32. издание на „Охрид фест – Охридски трубадури“ со песната „Сокаци тесни“.

Како и минатата година за „На тебе сум осуден“, комплетен автор и продуцент и на годинашната фестивалска песна е
познатиот охридски продуцент, композитор и текстописец Јовица Каралиевски.

– Песната е лесна како „шампита”, лапни-голтни , а ни раскажува за тесните варошки сокаци и охридските приказни што тие ги чуваат како тајни скриени, открива авторот Каралиевски за песната.

Владо Броз и Марама веќе подолг период наназад важат за една од најпознатите и најпопуларните музички атракции во Охрид, но и многу пошироко.

„Охрид фест – Охридски трубадури“ ќе се одржи на 29-ти и 30-ти август на летната сцена „Долни Сарај“. И годинава ќе учествуваат познати имиња од домашната и балканската фолк и поп сцена, а влезот ќе биде слободен. (Крај)

извор: ИнПрес фото: архива