Охрид, 2. јуни 2025 (ИНПРЕС) – Камера поставена пред пештерата Свинска стрна регистрираше дива мачка што ја корисисти оваа пештера во Националниот парк „Галичица“ како привремено живеалиште.
Во рамки на проектот „Заштита на пештерските екосистеми и загрозените растителни и животински видови во НП „Галичица“ воспоставен е редовен мониторинг на пештерите, што е одлична алатка за проучување на пештерските екосистеми во заштитеното подрачје.
– Дивата мачка претставува загрозен вид. На главата има кратка муцка и кратки уши. Има тело кое е покрено со густо сиво-кафеаво крзно, со напречни темни шарки и една темна по должината на грбот. На кратката дебела опашка има црни прстени и црн врв. На предните нозе има пет прсти, а на задните четири. Живее во шуми со шумски чистини. Има одлично развиен слух, вид и допир, а послабо развиен мирис. Дивата мачка е месојад кој лови зајаци, птици, глувци. Лови приквечер или во зори. Добро трча и се качува по дрвја. Мажјакот е поголем од женката. Неговото тело е долго до 90 cm и е тежок до 15 кг. Женката при крајот на пролетта окотува до 4 младенчиња во засолниште меѓу камења или во шупливо стебло, ретко во грмушки. Обично живее 10-12 години, информираат од охридскиот Црвен крст.
Проектот „Заштита на пештерските екосистеми и загрозените растителни и животински видови во НП „Галичица“ е поддржан од Prespa Ohrid Nature Trust – PONT, а го спроведуваат Црвен крст Охрид и Истражувачко друштво „Урсус спелеос“ – Скопје во соработка со ЈУ Национален парк „Галичица“. (Крај)
извор: ИнПрес фото: архива
