Охрид, 17. јули 2025 (ИНПРЕС) – Досега се пријавени 14 лица на јавниот повик за работно ангажирање на невработени лица за заштита и превенција од пожари и заштита и оплеменување на животната средина, информираат за Супер радио и OhridPress од охридскиот Центар за вработување.

Повикот предвидува работно ангажирање на 10 невработени лица, рокот за пријавување истекува денес во 15:00 часот, а од Центарот очекуваат да добијат уште некоја пријава.

Работното ангажирање на невработените лица ќе биде реализирано за период до најмногу 5 (пет) месеци. За кандидатите што ќе бидат избрани и работно ангажирани се предвидува да им биде исплатен месечен износ од 24.000 денари со вклучено осигурување за инвалидност и телесно оштетување причинето со повреда на работа и професионална болест и данок на личен доход.

Изборот на кандидати ќе го спроведе општината во соработка со Дирекцијата за заштита и спасување (ДЗС) и Противпожарен сојуз на Македонија. Кандидатите се должни да учествуваат на обука организирана од Противпожарниот сојуз на Македонија за користење противпожарна опрема и стекнување на вештини за справување и превенција од пожари. (Крај)

извор: ИнПрес фото: архива