Охрид, 12. ноември 2025 (ИНПРЕС) – Друштвото за истражување и развој „Сефиданис” од Охрид доби официјален Сертификат од Стопанската комора на Македонија.

Ова значи потврда на регистрацијата на компанијата за истражување и развој, нејзините потенцијали за надворешна трговија, и најважно, статусот на единствен производител на хуманоиден робот, паметен споменик и телемедицински уред.

– Ова признание од Комората е значајна потврда за нашите капацитети да произведуваме хуманоидни роботи, паметни споменици и телемедицински уреди базирани на вештачка интелигенција. Тоа ги поедноставува извозните процедури, ја прецизира царинската класификација и отвора нови можности за меѓународни партнерства. Ова е важно за полесен извоз: Тарифните броеви и сертификатот го олеснуваат преминот на производите преку царина; сигнал за иновации: Комората потврдува дека „Сефиданис” е единствен производител за овие категории на висока технологија и општествена корист: производните линии поддржуваат образование и едукација, конзервација на културното наследство и промоција на туризмот, како и пристапно здравство за сите. Од Охрид, преку Н99, до светот, докажуваме дека големи работи се прават и дома. Да не чекаме совршени услови, да ги создадеме заедно, велат од друштвото „Сефиданис“.

Основач на Друштвото за истражување и развој „Сефиданис” од Охрид е проф. д-р Анис Сефиданис, професор на Факултетот за машинска интелигенција и роботика на Универзитетот за информатички науки и технологии „Св. Апостол Павле“ во Охрид. Тој е креатор на три аватари што комбинираат хардвер и софтвер и кои припаѓаат на полето на дигиталната хуманост. Првиот е паметниот споменик на Григор Прличев кој комбинираше холографија и вештачка интелигенција, потоа Споменикот на иднината претставен по повод празникот Св. Кирил и Методиј, како и хуманиодниот робот, кој ќе работи како првиот Dj во светот. (Крај)

извор: ИнПрес фото: архива