Охрид, 14. јануари 2026 (ИНПРЕС) – Договорот на Општина Охрид за новогодишното украсување на градот „тежел“ 66.713 евра, покажуваат податоците на Центарот за граѓански комуникации (ЦГК) за трошоците на единиците на локална самоуправа за новогодишно украсување.
Со оваа сума Охрид е на трето место меѓу 36-те општини во земјава што имале тендери за новогодишно украсување. Договорот е потпишан со фирмата „Линк Медиа Плус“ од Скопје.
Најмногу пари за новогодишно украсување потрошила Општина Штип склучувајќи договор со фирмата Линк Медиа Плус од Скопје во вредност од 4.998.480 денари, односно 81.276 евра. Градот Скопје е на второ место со договор склучен со истата фирма во вредност од 4.271.600 денари, односно 69.457 евра.
Тендерски постапки за украсување во пресрет на новата 2026 година спровеле 36 општини. Во најголем дел, тендерите за новогодишно украсување ги спровеле самите општини, а во помал дел, овие тендери ги спровело некое од нивните локални јавни претпријатија. 31 од овие 36 општини доставиле податоци за склучените договори за украсување до Електронскиот систем за јавни набавки, заклучно со 12 јануари 2026 година. Преостанатите 6 општини сè уште не доставиле известувања за склучените договори, иако законскиот рок е само 10 дена по склучување на договорите.
На 81% од тендерите за украсување немало конкуренција, односно учествувала само по една фирма. Една иста фирма, Линк Медиа Плус, добила 78 % од вредноста на сите тендери за украсување во земјава, 94 % од договорите за јавна набавка за украсување се склучени во декември, на нецели две недели од новата година. (Крај)
извор: ИнПрес фото: ИнПрес/архива
