Подгорци, 4. јуни 2025 (ИНПРЕС) – Празникот Св.Јован Владимир свечено одбележан во струшкото село Подгорци, во единствената црква во земјава посветена на овој светец.
Денес навршуваат 100 години од првото осветување на црквата и 1 010 од упокојувањето на Св.Јован Владимир. Минатата година на денешен ден црквата беше преосветена.
Бројни верници присуствуваа на денешната празничната богослужба, запалија свеќи и се помолија за здравје,среќа и благосостојба.
Овој свет храм е изграден по иницијатива на мештаните од село Подгорци на старо вакавско место. Почнат е со градба 1924 година, завршен една година подоцна во 1925 и истата година е осветен. Храмот е во правоаголна едноставна форма со апсида напред, но тогаш не е фрескоживописан. Сега по 100 години од неговата градба, се фрескоживописа и плени со својата велелепност. Уреден е и просторот околу самата црква.
Јован Владимир бил кнез, владетел на Дукља, кој во еден период бил заробен од Цар Самоил. Во затворот во Преспа го сретнала ќерката на цар Самоил и се вљубила во него и тој му станува зет. Но, трагично му завршува животот по распаѓањето на Самоиловото царство. Така завршува неговиот овоземен живот, но станува светител и го продолжува животот во царството небесно
Сегашната конструкција на црквата е започната во 2021 година, со заложби и со донација на Владо Пупиноски, а со помош на Иницијативниот и на Црковниот одбор од селото. Храмот е целосно фрескоживописан од зографот Тони Милцов, а реставрацијата на иконостасот е дело на Перо Шутиноски. Поставен е и нов мермерен под и нов престол.
Култот кон Св.Јован Владимир е доста раширен кај жителите на Подгорци и околните места, но и во западна Македонија. И во минатото, традиционално, на 4-ти јуни се собирал народот на т.н. софри. Секоја фамилија си имала свој дел околу црквата каде што се собирала и организирала ручек. (Крај)
извор: ИнПрес фото: Жанко ЗШ Голабоски
