Охрид, 14. ноември 2025 (ИНПРЕС) – Во понеделник, 17-ти ноември, во Центарот за култура „Григор Прличев“ премиерно ќе биде изведена претставата  „Хелверовата ноќ“.

Претставата е во режија на Александар Јовановски, играат Даријан Петров и Јасмина Билаловиќ, а е во продукција на ЗУКЦ „Медиа артес“ Охрид.

Базирана на истоимената драма на најпознатиот современ полски драматург, режисер и професор Ингмар Вилквист (алијас Јарослав Свијершч) напишана во 1999 година, претставата на суптилен и потресен начин ја прикажува чудната врска помеѓу мајка и посинок – млад човек со посебни потреби.

– Преку слоевитиот однос мајка-дете, старател-штитеник, брат-сестра, маж-жена, џелат-жртва, авторот гради интимна приказна за две различни суштества кои се обидуваат да најдат смисла и сигурност во свет кој секоја „различност“ ја дочекува со насилство и осуда. Во атмосферата на тоталитарниот, фашистички занес од 1930-тите, „Хелверовата ноќ“ ја разоткрива трагичната судбина на оние кои не припаѓаат на мнозинството – оние за кои едноставно нема место во таков свет, велат од продукцијата.

Почетокот на претставата е во 20:00 часот, а цената на билетот е 400 денари. Карти во продажба на билетарата на Центарот, секој работен ден од 10:00 до 17.00 часот и од 13:00 до 20:00 часот на денот на изведба на претставата. (Крај)

извор: ИнПрес фото: архива