Охрид, 23. јули 2025 (ИНПРЕС) – И во текот на цела година, но особено во текот на летната сезона излегува на површина сообраќајната (не)култура.
Со чест на исклучоците, но сообраќајната култура, етиката, толеранцијата во сообраќајот, сè уште не се на задоволително ниво.
Читатели на InPress до нашата редакција повторно испратија фотографии од возила и мотори паркирани на тротоар.
– Тротоарите се претворени во паркиралишта, не може да се помине, „посовесните“ ги паркираат возилата на дел од коловозот поткачени на тротоар, но со вклучени четири трепкачи, што како да ги амнестира од одговорност.
Често пати и мотори знаат да бидат оставени на тротоар, а сликата пред популарните скалички за „влез“ во чаршијата е приказна за себе, реагираат граѓаните.
Охрид е исполнет со гости, не очекува Илинденскиот викенд кога се очекува уште поголема посетеност. Сето ова во комбинација со бројните музички настани што нѐ очекуваат укажува дека ќе се изнагледаме окупирани тротоари, па и зелени површини.
Човечкиот фактор е еден од клучните елементи кои влијаат на нивото на безбедност во сообраќајот. Процесот на промена на навиките и културата на однесување во сообраќајот е бавен, но затоа секој од нас преку личен пример треба да придонесе за побезбеден сообраќај. (Крај)
извор: ИнПрес фото: ИнПрес
