Охрид, 7. ноември 2025 (ИНПРЕС) – Утре ќе се одржи петтиот хуманитарно-меморијален планинарски марш „Трајан Целески-Тачо“.
– После пет години од прераната смрт на нашиот „брат“ Тачо, споменот за него не бледнее. Неговата ведрина и дух сѐ уште се инспирација за многу од нас да се себенадминуваме, да помагаме. Традицијата нека се раѓа спонтано. Планинарски марш ќе има и оваа година, порачуваат организаторите.
Маршот ќе започне во 10:00 часот во близина на неговиот дом, кај спортското игралиште именувано во негова чест „Трајан Целески-Тачо“.
– Патеката започнува од населба Видобишта-Манастир Свети Никола, Велгошти и назад. Истата е умерена и е во должина од 10 километри во двата правци. Водич на турата ќе биде Дејан Ангелоски, апсолутен шампион во планинско трчање кај нас и повеќекратен победник на меѓународни трки во скајранинг, додаваат организаторите.
Потсетуваат дека сите заинтересирани да понесат вода, храна како и топла облека, а малолетните лица ќе треба да се во придружба на возрасни. Секој учесник учествува на сопствена одговорност.
Доброволни прилози ќе може да се остават во хуманитарни кутии на Црвен крст Охрид. (Крај)
извор: ИнПрес фото: архива
