Виена, 12. мај 2026 (ИНПРЕС) – Со првото полуфинале, вечерва во Виена започнува јубилејното 70. издание на изборот за песна на Евровизија.
По победата на Џеј-Џеј со „Wasted Love“ минатата година, Австрија доби „виза“ да по трет пат да го организира изборот.
Вечерва ќе настапат претставниците на 15 земји, меѓу кои Шведска, Финска, Србија, Полска, Грција и Израел. Прва е Молдавија со Сатоши и песната „Viva, Moldova!“, а последни претставниците на Србија, групата „Лавина“ и песната „Крај мене“. Од земјите од соседството ќе настапат Грција, Хрватска и Црна Гора, земја повратник на Евросонг.
Полуфиналната вечер ќе ја отвори легендарната Вики Леандрос со изведба на „L’amour est bleu“, песната со која Луксембург победи на Евровизија во 1967 година. Организаторите најавуваат и специјални интервални настапи, акробатски перформанси и музички сегменти инспирирани од австриската култура. Водители ќе бидат австриските телевизиски ѕвезди Викторија Сваровски и Михаел Островски, додека од т.н.зелена соба ќе известува Емили Басвајн.
Годинашното издание, иако Евровизија традиционално се претставува како музички и неполитички настан, е обележано со сериозни контроверзии поврзани со учеството на Израел и војната во Газа. Пет земји – Исланд, Ирска, Холандија, Словенија и Шпанија одлучија да ја бојкотираат Евровизија 2026 во знак на протест поради дозволата Израел повторно да учествува на натпреварот. Ова е најголем бојкот во историјата на Евросонг уште од 1970 година.
Во четврток е второто полуфинале, а финалето е во сабота. Трите евровизиски вечери ќе се одржат во арената „Винер Штадхале“, една од технички најамбициозните во историјата на натпреварот. Почетокот е во 21:00 часот, а МТВ и Македонското радио ќе вршат директен пренос. (Крај)
извор: ИнПрес фото: архива
