Белград, 16. октомври 2014 (ИНПРЕС) – Рускиот претседател Владимир Путин пристигна во Србија. Неговиот српски колега Томислав Николиќ го пречека на меѓународниот аеродром „Никола Тесла“ во Белград.

– Путин ќе оствари средби со највисоките српски претставници и ќе биде почесен гостин на воената парада по повод 70-годишнината од ослободувањето на Белград, пишува B92. За време на престојот во српската престолнина тој ќе положи венци пред спомениците на ослободители на Белград и на хероите од Првата светска војна. Рускиот претседател ќе се сретне со српскиот колега Томислав Николиќ и премиерот Александар Вучиќ, а ќе го добие Орденот на Република Србија.

Покрај Путин, во Србија пристигнаа уште министерот за енергија Александар Новак, извршниот директор на „Газпром“ Алексеј Милер, директорот на Федералните царински служби Андреј Белјанинов, министерот за вонредни ситуации и цивилна заштита Владимир Пучков и директорот на Федералната служба за миграција Константин Ромодановски.

Предвидено е потпишување на пакет од 9 договори од сферата на воената соработка, енергетиката и железницата. Руската страна најверојатно повторно ќе го покрене прашањето за оданочување на Нафтената индустрија на Србија, од која поголемиот дел е во сопственост на „Газпром“.

Ова ќе биде трета посета на Владимир Путин на Белград. Неговата прва посета беше во 2001 година, во својство на шеф на државата, а 10 години подоцна беше во Белград како премиер. Во средината на 2012 година, тој се сретна со претседателот Николиќ, а во јули оваа година – со премиерот Вучиќ.

Следете ја во живо посетата на Путин на Белград преку RT. (Крај)

извор: RT фото: архива