Охрид, 14. октомври 2025 (ИНПРЕС) – Водостојот на Охридското Езеро падна под природната кота и полека но сигурно се приближува до минимално дозволената.
Според денешните мерења на Управата за хидрометеоролошки работи на Република Македонија (УХМР), водата е на кота од 693,15 м.н.в што е за 16 сантиметри под просекот за октомври (693,31 м.н.в), 2 сантиметри под природната кота (693,17 м.н.в) и на само 5 сантиметри над минимално дозволената кота (693.10 м.н.в).
По минималниот раст, изминатава недела со чести осцилации водостојот е намален за цели три сантиметри. Покрај тоа од препознатливиот симбол на градот Охрид, Билјанините извори, и понатаму не истекува вода, а ваквата состојба трае веќе два месеци.
И додека во минатото имаше случаи кога беше надмината и максималната кота од 693,75 м.н.в, сега повторно состојбата е алармантна бидејќи водостојот се доближува до минимално дозволеното ниво. Ваквата состојба трае веќе подолг период и пред се должи на долгиот сушен период, без врнежи од дожд, состојбата со Преспанското Езеро, отвоерноста на портите кај истекот на езерото во реката Црн Дрим…Останува да видиме дали барем во мала мера најавените врнежи од дожд позитивно ќе се одразат на хидролошката состојба на езерото.
Во Охрид денес сончево време со мала до умерена облачност. Ќе дува слаб до умерен ветер од северен правец. Максималната температура ќе се искачи до 18. степени.
– Под влијание на влажни воздушни маси, од среда ќе преовладува променливо облачно време со локални врнежи од дожд. Дневната температура ќе опадне за неколку степени, информираат од Управата за хидрометеоролошки работи на Република Македонија (УХМР). (Крај)
извор: ИнПрес фото: ИнПрес
