Атина, 22. март 2016 (ИНПРЕС) – Обвинителката од грчкиот Врховен суд Ефтерпи Коцамани му наложи на јавното обвинителство во Солун да почне прелиминарна истрага за потеклото на флаерот кој се делел меѓу бегалците и мигрантите во кампот во Идомени, со кој се повикуваат илегално да ја преминат границата со Македонија, јави дописникот на МИА од Атина.

Според некои извори, Коцамани побарала од обвинителите да ги пронајдат одговорните за печатење и дистрибуција на флаерот во кампот за бегалци на границата меѓу Грција и Македонија, што охрабри неколку стотици луѓе да се обидат да влезат во Македонија преку помалку обезбедени делови долж границата. Напишан на арапски, флаерот содржи инструкции, вклучувајќи и мапа и насоки за алтернативен пат по кој може да се премине границата.

Министерствата за правда и за цивилна заштита претходно испратија информации собрани од страна на грчката полиција во врска со потеклото на флаерот, во рамките на процедура со која требаше да се утврди дали треба да има прелиминарна судска истрага. (Крај)

извор: МИА фото: архива