Белград, 19. септември 2014 (ИНПРЕС) – Србија започнува со намалување на пензиите и платите во јавниот сектор. Сите кои примаат над 25.000 динари ќе бидат опфатени со новите економски мерки на владата.
– Србија е далеку од банкрот, рече српскиот премиер Александар Вучиќ во опширното интервју за државната телевизија РТС. Мерките на кабинетот се однесуваат и на „борбата против сивата економија, намалување на администрацијата во јавниот сектор, намалување на субвенциите за одредени државни претпријатија и поддршка на бизнисот“. Мерките се очекува да стапат на сила уште во текот на следниот месец.
– Сето ова ќе придонесе за оздравување на болната српска економија и ќе доведе до излез од кризата во 2016 година, рече Вучиќ.
Според него, 60.2 % од пензионерите нема да бидат засегнати од намалувањето. Најзасегнати ќе бидат оние кои примаат над 60.000 динари месечна пензија. Со 20 % данок ќе бидат оданочувани оние кои добиваат плата од над 100.000 динари.
Александар Вучиќ неколку пати повтори дека „Србија не е во банкрот и дека е ликвидна“.
– Нашата земја има доволно пари за до месец април да нема потреба да зема заем. Земјоделство ни е целосно уништено и во моментов сме на ниво од 1910 година. Од 2008 до 2012 година дојде до неверојатно зголемување на долгот од 8 на 17,67 милијарди евра. Приватниот сектор е целосно уништен. Платите во јавниот сектор се за 40 % повисоки од оние во приватниот, соопшти српскиот премиер. (Крај)
извор: РТС фото: архива