Атина, 7. декември 2014 (ИНПРЕС) – Грција и Турција поставија нова заедничка цел за развивање на регионалната соработка, особено во енергетскиот сектор преку градење и проширување на мрежата на гасоводи.
Ова се наведува во заедничкото соопштение објавено на крајот на третата сесија на Врховниот совет за соработка меѓу Грција и Турција. На состанокот присуствуваа членовите на владите на двете земји.
Во документот се истакнува дека „Грција и Турција го поставуваат како цел понатамошниот развој на билатералната и регионалната соработка во енергетскиот сектор, особено во поглед на гасоводите“.
– Транс-јадранскиот гасовод (ТАП) и Транс-анатолскиот гасовод (ТАНАП) се меѓусебно поврзани и несомнено се најефективниот пат од гледна точка на трошоците за транспорт на природен гас од Каспискиот регион до Западна Европа (по 2020 година), се вели во заедничкото соопштение.
Грчкиот вицепремиер и министер за надворешни работи Евангелос Венизелос изјави во петокот во своето обраќање на форумот во Атина дека Грција придава големо значење на изградбата на Јужниот енергетски коридор.
– По последните настани во врска со „Јужен поток“, сето ова доби дополнително значење за економскиот развој и меѓународната политика, рече грчкиот вицепремиер. (Крај)
извор: АФП фото: АП