ИЈЗ: Има намалување на бројот на заболени од грип, во Охрид регистрирани 99 случаи и сѐ уште висока активност на вирусот

Охрид, 5. февруари 2026 (ИНПРЕС) – Во петтата недела од 2026 година, во периодот од 26-ти јануари до 1-ви февруари, во Република Македонија се пријавени 1.498 случаи на групни пријави за заболени од грип и заболувања слични на грип, за 12,3% помалку во споредба со минатата недела се наведува во најновиот извештај на Институтот за јавно здравје (ИЈЗ).

Од нив 866 лица се на возраст од 15-64 години, 224 лица на возраст над 65 години, 247 деца на возраст од 5-14 години и 161 на возраст од 0-4 години.

– Заболените лица оваа недела се регистрирани во Скопје -473, Прилеп – 146, Струмица – 139, Охрид – 99, Битола – 77, Штип – 70, Тетово – 63, Гевгелија – 61, Куманово – 59, Дебар – 43, Велес – 36, а во Радовиш, Кичево, Кавадарци, Струга, Гостивар, Ресен, Неготино, Свети Николе, Кратово, Крушево, Виница, Демир Хисар, Пробиштип, Кочани, Македонски Брод, Пехчево и Валандово бројот на заболени е помал од 30. Во Берово, Делчево и Крива Паланка нема пријавени заболени лица од грип и заболувања слични на грип, стои во извештајот.

Во Охрид изминатите три недели има намалување во бројот на новозаболени, но и понатаму се бележи висока активност на вирусот на грип.

Во сезоната 2025/2026 вкупниот број на случаи на грип/заболувања слични на грип изнесува 11.415. Во споредба со истиот период од минатата сезона, бројот на пријавени случаи е зголемен за 30,7 %. Во текот на сезоната на грип, регистрирани се четири починати лица асоцирани со грип.

Од 16 октомври започна да се спроведува бесплатната вакцинација против сезонски грип за ризичните групи граѓани, а интересот е голем. Досега на ниво на Република Македонија со бесплатна вакцина се имунизирани вкупно 79.105 лица од ризичните категории. Покрај тоа набавени се и 2.400 дози комерцијални вакцини за останатото население и досега се имунизирани 1.836 лица.

Вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход особено кај ризичните групи. (Крај)

извор: ИнПрес фото: ИнПрес