Приштина, 18. октомври 2014 (ИНПРЕС) – И косовскиот премиер Хашим Тачи се вмеша во преписката која преку Твитер ја водат премиерите на Србија и Албанија, Александар Вучиќ и Еди Рама, по последните немили настани на стадионот на Партизан во Белград и натпреварот меѓу фудбалските репрезентации на Србија и Албанија.

Тачи преку неговиот профил на Фејсбук ја изрази поддршката за одлуката на Рама да го посети Белград.

– Западен Балкан навлегува во неповратен процес во евроатлантската интеграција, која има една главна цел – подобрување на животниот стандард на граѓаните. Овде уште се слуша јазикот на омразата и провокациите кои доаѓаат од нашето тажно минато. Договорот од Брисел меѓу Белград и Приштина конечно ќе ја затвори вратата на војните и промената на границите, напиша Тачи на социјалната мрежа.

Тој додаде дека „дијалогот со соседите и разбирањето треба да бидат главните столбови во политиката, за да се исполнат евроатлантските критериуми“. (Крај)

извор: АФП фото: АП