Меркел и Оланд денес во Берлин ќе бараат решение за мигрантската криза

Берлин, 24.август 2015 (ИНПРЕС) – Германската канцеларка Ангела Меркел и претседателот на Франција, Франсоа Оланд денеска ќе се сретнат во Берлин каде ќе разговараат за напорите на Европската унија да се справи со најголемата мигрантска криза во последните 50 години, пренесува српски „Блиц“.

Освен тоа, двајцата државници ќе разговараат и на тема Украина, па поради тоа, подоцна во текот на денот ќе им се придружи и претседателот на Украина, Петро Порошенко.

По средбите, Меркел, Оланд и Порошенко ќе одржат заедничка конференција. На средбата нема да учествува рускиот претседател Владимир Путин. Поради тоа, еден од украинските извори вели дека неучеството на рускиот претседател Путин на состанокот во Берлин, укажува на тоа дека Франција и Германија се на страната на Украина, но француски извор остро негирал дека постои било каква „дипломатска војна против Русија“.(Крај)

извор:Блиц фото:архива