Аеродром Охрид „Св. Апостол Павле“
Скопје/Охрид, 13. октомври 2024 (ОХРИДПРЕС) – Македонското Министерство за транспорт и врски наскоро треба да го објави списокот на авиокомпании кои се јавија на неодамнешниот јавен повик за воспоставување летови до аеродромите во Скопје и Охрид во замена за субвенции.
Овој тендер, наводно, привлече најголем интерес од авиокомпаниите од почетокот на програмата за субвенционирање во 2012 година.
Новата тригодишна програма за субвенционирање ќе трае од 1. јануари 2025 година до 31-ви декември 2027 година и, за разлика од изминатите дванаесет години, беше отворена за сите меѓународни дестинации, не ограничена само на европските превозници и линии.
Македонската влада веќе навести некои од претстојните случувања. Летовите меѓу Дубаи и Скопје се очекува да бидат обновени следната година по петгодишен прекин, а се очекува да бидат пуштени и линиите меѓу Истанбул и Охрид. Понатаму, македонскиот министер за транспорт и врски, Александар Николоски, неодамна разговараше и со шпанскиот и со чешкиот амбасадор за воведување летови.
Операторот на скопскиот и охридскиот аеродром, ТАВ Македонија, како приоритет го зацрта обновувањето на услугите меѓу главниот град на земјата и Барселона. Летовите меѓу двата града последен пат беа одржувани од Wizz Air во јануари 2022 година.Се верува дека и Wizz Air учествувал на неодамнешниот тендер. Авиокомпанијата се соочува со тековни проблеми со моторите на авионите по што беше намалена нејзината флота, што доведе до намалување на услугите од нејзината база во Скопје.
И покрај победата на претходниот јавен повик, нискобуџетната компанија не ги исполни своите обврски, лансирајќи само две од четирите планирани линии. Не ги започна планираните операции од Скопје до Штутгарт и до Луксембург. Во текот на изминатите неколку години, Wizz Air прекина неколку линии со кои сообраќаше од македонскиот главен град пред пандемијата, вклучувајќи ги Ваксјо, Турку, Ларнака, Хановер и Барселона. Авиокомпанијата, исто така, ги прекина своите операции од Охрид до Базел, Лондон Лутон, Милано Малпенса и Малме. (Крај)
извор: МИА фото: архива
