Новата хрватска претседателка денес ќе положи заклетва

Загреб, 15. февруари 2015 (ИНПРЕС) – Колинда Грабар-Китаровиќ, новата претседателка на Хрватска, денес ќе положи заклетва и официјално ќе стапи на должноста претседател на земјата на церемонија на која ќе присуствуваат претставници на 88 држави.

Свечената церемонија ќе започне напладне на отворено – на плоштадот „Свети Марко“ во центарот на Загреб. Грабар-Китаровиќ ќе одржи говор кој се очекува да трае 15-20 минути.

На настанот ќе присуствуваат претседателите на Црна Гора, Албанија, Унгарија, Словачка, Словенија, Косово, Босна и Херцеговина и македонскиот претседател Ѓорге Иванов. Во Загреб ќе пристигне и српскиот премиер Александар Вучиќ, и покрај сложените односи меѓу двете земји.

46-годишната Колинда Грабар-Китаровиќ е првата жена претседател во историјата на Хрватска. Таа го победи Иво Јосиповиќ со минималната разлика од 1,5% или 32.500 гласа. Грабар-Китаровиќ ја водеше изборната кампања под слоганот „За подобра Хрватска“. Таа остро ја критикуваше економската политика на Владата и актуелниот претседател, кого го обвини во недостаток на иницијатива за заживување на економијата во земјата. (Крај)

извор: Инпрес фото: архива