Новиќ: Коктел културата во Македонија се подигнува на завидно ниво

Охрид, 3. март 2023 (ИНПРЕС) – Познатиот охридски бармен и коктел мајстор Даниел Новиќ по шести пат учествуваше на Државното првенство на бармени на Македонија.

На ваквите настани особено е значајна дружбата пред сé, но и се одлично место да ги претставиш своите креации, вели Новиќ за Супер радио и InPress. Тој годинава се претстави со авторскиот коктел „Final four“.

– Ова ми беше шесто учество на Државно првенство на бармени на Македонија. Во категорија long drink, се претставив со Final four, како главна состојка беше Havana Club, потоа содржи ликер од праска, лимета…Ме претставија како ветеран, во последен момент одлучив да учествувам, додаде Новиќ.

Потенцира дека особено го радува што за првенството имало интерес и биле пријавени многу млади, нови лица. Новиќ истакна дека последниве години во Македонија се подигнува нивото на коктел културата.

Задоволен од тоа како помина годинашното, 14-то првенство на бармени е и Никола Јосески, потпретседател на Асоцијацијата на бармени на Македонија и еден од организаторите на првенството.

Стружанецот Јосески два пати ја претставувал Македонија на Светско првенство во Сингапур и Токио.

– На првенството учествуваа 15 најдобри бармени од цела Македонија кои се натпреваруваа во квалификации. Од квалификации во полуфинале влегоа најдобрите 12 натпреварувачи кои се натпреваруваа во повеќе категории, blind tasting, speed round, а имаа и тест на знаење. Од квалификации ги добивме најдобрите четворица финалисти кои се натпреваруваа во категорија long drink, во која задолжителна состојка беше Havana Club, најдобриот рум од Куба, вели Јосески за Супер радио и InPress.

Оваа година честа да ја претставува Македонија на Светското првенство во Рим и воедно нов македонски шампион е Вања Головски, второто место му припадна на најмладиот натпреварувач Никола Анастасијески, а трето место освои Дејвид Кузманов.

извор: ИнПрес фото: архива