Париз, 11. февруари 2026 (ИНПРЕС) – Охрид е наш врвен приоритет и заедно во тесна соработка со Владата, остануваме целосно посветени на спроведување на препораките за заштита на Охридскиот Регион како светско културно и историско наследство заштитено од УНЕСКО, ова меѓу другото го истакна градоначалникот на Охрид Кирил Пецаков на средбите со високи претставници на УНЕСКО во Париз.
Посетата ја оценува како исклучително значајна, бидејќи за првпат еден градоначалник на Охрид остварува директна средба со Генералниот директор на УНЕСКО.
– Моја должност е гласот на Охрид да се слушне директно таму каде што се носат одлуките за светското наследство. На средбата јасно ги пренесов нашите позиции – дека Охрид е наш врвен приоритет и заедно во тесна соработка со Владата, остануваме целосно посветени на спроведување на препораките за заштита; работиме на долгорочна и одржлива заштита која ќе го зачува статусот на Охридскиот Регион на Листата на светско наследство, а ја истакнавме подготвеноста за продолжување на соработката со Република Албанија, бидејќи езерото бара заеднички пристап, вели Пецаков.
Нагласи дека Охрид бара лидерство и конкретни дела, а оваа посета е само почеток на една нова ера на транспарентна и засилена грижа за нашето наследство, со конкретни чекори да ја оправдаме довербата и да го заштитиме нашето природно и културно богатство. (Крај)
извор: ИнПрес фото: архива
