Белград, 23.јуни 2015 (ИНПРЕС) – Британската предлог-резолуција за најостра осуда на геноцидот во Сребреница ги изненади Србите. „Србија не ја разбира смислата ни целта на таа резолуција“, регира официјален Белград во писмото до постојаните членки на Советот за безбедност на Обединетите нации.
Српските власти во ваквиот потег гледаат ризик од дестабилизација на ситуацијата во регионот и политичките односи во Србија. Велат, каква било резолуција нема да придонесе за помирување во регионот, туку, напротив, ќе предизвика тензии и недоразбирања. Во писмото се потенцира и дека наследството на минатото не смее да биде пречка за заедничка иднина.
– Република Србија им оддава почит на сите жртви на конфликтите на просторот на поранешна Југославија, со цврсто уверување дека сеќавањата и активностите, чија цел е минатото да не се заборави, треба да бидат исклучиво во функција на помирувањето и промовирањето на регионална соработка и добрососедство, пишува во писмото.
Нацрт-резолуцијата Велика Британија ја предложила по повод 20-годишнината од злосторството во Сребреница. Целта е да се осуди секакво негирање на геноцидот и да се повикаат земјите-членки на ОН во своите образовни програми да ја вклучат наставата за геноцидот и воените злосторства низ историјата за тие да не се повторат.(Крај)
извор:Телма фото:архива
