Рама: Посетата на Србија е нов почеток за целиот Балкан

Тирана, 5. ноември 2014 (ИНПРЕС) – Претстојната посета на Србија е нов почеток за целиот балкански полуостров, изјави албанскиот премиер Еди Рама, кој ќе го посети Белград на 10-ти ноември.

– Денешното време бара нов обединувачки приод за подобра иднина на нашите народи, оставајќи ги зад себе работите од минатото, кои ни пречеа да одиме напред и предизвикуваа многу конфликти и крвопролевања. Треба да го заборавиме минатото и заедно да пишуваме нови приказни за мирот и регионалната соработка, изјави Рама за агенцијата „Анадолија“.

Тој зборуваше и за конференцијата за Западен Балкан која се одржа во Берлин под покровителство на германската влада. Рама ја оцени како „историска за Балканот“.

– Денес веруваме дека Балканот и е потребен на Европа, исто како што и Европа му е неопходна на Балканот. Конференцијата во Берлин отвори нова страница и сега сите ние на Балканот, без да губиме време мора да најдеме нови начини за соработка во многу области, рече уште Рама и додаде дека балканските држави имаат голем потенцијал за економски раст, кој сепак, зависи од регионалната соработка. (Крај)

извор: Анадолија фото: АП