Прешево/Приштина, 11. мај 2015 (ИНПРЕС) – По престрелките во Куманово за време на викендот, војската на Србија го покрена нивото на борбена готовноста и е подготвена да го зачува нејзиниот територијален суверенитет и интегритет, порача синоќа српскиот министер за одбрана, Братислав Гашиќ, во текот на обиколката на базата „Цворе“, на границата со Македонија.
Базата Цворе која се наоѓа меѓу Прешево и македонската граница, доцна синоќа ја посетија и командантот на копнената војска и директорот на полицијата.
– Војската на Србија го подигна нивото на готовност и сигурен сум дека заедно со останатите безбедносни структури во земјава, ќе успееме да ги сочуваме суверенитетот и интегритетот на Република Србија и безбедноста на граѓаните на земјата, изјави Братислав Гашиќ, министер за одбрана на Србија.
По информациите дека во терористичката група имало и косовски државјани, Косово ја засили контролата на границата со Македонија. Од доцна синоќа, на граничниот премин Хан Елези – Блаце распоредена е дел од косовската специјална единица РОСУ, а другa група е на граничниот премин кој ги поврзува Косово со Србија и Македонија, во близина на Гњилане. Оваа одлука, синоќа на средба ја донеле косовската претседателка Атифете Јахјага, премиерот Иса Мустафа и министерот за внатрешни работи Скендер Хисени.
И Министерот за внатрешни работи на Република Српска, Драган Лукач, изјави дека постои потреба полицијата на Република Српска да остане во зголемена готовност заради терористичкиот напад во Куманово, бидејќи не може да се исклучи можноста ситуацијата од Македонија да се прелее надвор од нејзините граници, па дури и во БиХ. (Крај)
извор: Бета/24 Вести фото: архива