Српската прогресивна партија моментално со највисок рејтинг

Белград, 7.септември 2015 (ИНПРЕС) – Доколку во овој момент во Србија се одржат избори Српката прогресивна партија би освоила 48 отсто од гласовите, социјалистите десет, а од опозицијата изборниот праг ќе го минат само Демократската партија со шест проценти и Либерално-демократската партија на Чедомир Јовановиќ со пет отсто.

Ова се резултатите од анкетата на Ипсос Стратеџик маркетинг, изработена по нарачка на американската организација Меѓународен републикански институт, пишува белградскиот весник „Данас“.

Сите останати учесници на изборите, според истражувањето, ќе останат надвор од Парламентот. Од нив најмногу гласови би добиле Српската радикална партија на Воислав Шешељ и Социјалдемократската партија на Борис Тадиќ, по четири отсто.

Истражувањето покажува дека во моментов 54 отсто од граѓаните ја поддржуваат работата на актуелната Влада, додека 40 проценти не ја поддржуваат.

Четириесет и еден отсто од анкетираните сметаат дека премеирот Александар Вучиќ е политичар со потенцијал да промени нешто во Србија. На второ место е посочен лидерот на социјалистите Ивица Дачиќ со четири отсто.(Крај)

извор:Данас фото:архива