Скопје, 17. февруари 2023 (ИНПРЕС) – Во координација со јавните здравствени установи, се очекува потребната документација за исплата на плати да се прибере најдоцна до понеделник, а со цел што поскора исплата на платите на здравствените работници, информираат од Фондот за здравствено осигурување на Република Македонија.

Ги демантираат наводите дека податоците на граѓаните се украдени и уверуваат дека здравствените и личните податоци на граѓаните се целосно безбедни.

– Оваа прилика би сакале да ја искористиме можноста и повторно да потврдиме дека анализата на експертските технички тимови утврди дека при сајбер нападот нема излевање на податоци надвор од базите на Фондот. Ја уверуваме јавноста дека ги користиме сите расположливи капацитети и знаењата на сите внатрешни и надворешни ИТ експерти за кои има правна можност, а со привремените решенија кои Фондот ги операционализира во кус рок, се надминуваат дел од проблемите, особено и се овозможува функционирање на системот во услови на сајбер напад, соопштија од Фондот.

Додаваат дека во однос на исплатата на боледувањата, породилното отсуство и рефундацијата, со ставање на системот во целосна функција ќе бидат исплатени сите обврски на ФЗО кон осигурениците, но и кон здравствените установи.

– Подрачните служби на Фондот функционираат согласно препораките и во континуитет ги примаат барањата, а контролорите од Фондот веќе е и започнуваат со контроли на терен врзани со спроведувањето на сите споделени упатства и насоки за работење, стои во известувањето.

Сите осигуреници непречено можат да се обратат до подрачните служби кои се достапни и телефонски преку јавно објавени линии за информации за осигурениците, и да добијат информации во врска со сите решенија кои се усогласени со матичните лекари, а преку кои осигурениците можат да ја остварат здравствената заштита. (Крај)

извор: ИнПрес фото: архива