Њујорк, 30. септември 2015 (ИНПРЕС) – Грчкиот премиер Алексис Ципрас, поради Македонија, одбил да присуствува на Генералното собрание на ОН на состанокот за борбата против ИСИС, јавува Мета.

Ниту Ципрас, ниту грчкиот шеф на дипломатијата Никос Коѕиас не се појавија бидејќи Македонија на него учествуваше под уставното име.

Според извори од кабинетот на Ципрас, тој не присуствувал од две причини, едната бидејќи наместо под референцата БЈРМ, Македонија беше претставена под уставното име, додека втората причина, според Атина, била фактот што Ципрас немал право на коментар на самиот состанок, односно немало да биде во можност воопшто да ги произнесе своите ставови и впечатоци за идните планови за справување со џихадистите.

И покрај тоа што Ципрас отсуствуваше од состанокот, сепак ден по неговиот кус неформален разговор со Груевски, и шефот на грчката дипломатија Коѕиас се сретнал со Груевски.

Тој објави заедничка фотографија со Груевски на Твитер, но ниту тој, ниту грчкото Министерство за надворешни работи не известија што било дискутирано на оваа средба. (Крај)

извор: Мета фото: архива