Атина, 23. март 2016 (ИНПРЕС) – Грчкиот премиер Алексис Ципрас ја повика германската канцеларка Ангела Меркел што поскоро во Грција да испрати експерти кои ќе помогнат во примената на многу критикуваната спогодба меѓу ЕУ и Турција, која предвидува враќање назад во Турција на илјадници баратели на азил, информира ДПА.

– Во телефонскиот разговор Ципрас побара, исто така, Меркел да изврши притисок врз Турција за разбивање на шверцерските мрежи и да го засили присуството на НАТО во Егејско Море, изјави владиниот портпарол Олга Геровасили.

Спогодбата, што минатата недела беше одобрена од лидерите на ЕУ и Турција во Брисел, предвидува сите мигранти кои пристигнале на грчките острови по 20 март, а кои немаат право на азил, да бидат враќани во Турција.

Спогодбата во следните шест месеци ЕУ ќе ја чини 280 милиони евра и бара разместување во Грција на 4.000 експерти за бегалски прашања, судии, преведувачи, полицајци и други профили, посочија извори од ЕУ.

Германското Министерство за миграција и бегалци денеска соопшти дека група од петмина експерти во следните неколку дена треба да замине за Грција за да ја процени ситуацијата на лице место. (Крај)

извор: МИА фото: архива