Приштина, 11. септември 2014 (ИНПРЕС) – Претседателката на Косово Атифете Јахјага изјави дека пред Косово е важен и одлучувачки период на воспоставување на институции кои ќе ја гарантираат демократијата.
Потребно е да се покаже политичка зрелост и демократска култура, истакна Јахјага.
– Брзото воспоставување на институциите ќе го гарантира демократското функционирање на државата и ќе ја покаже способноста за управување со кризи и подготвеноста сами да наоѓаме решенија кои ќе ги исполнат очекувањата на граѓаните да имаат напредна држава, одговорна и почитувана како дел од евроатланското семејство, изјави Јахјага.
Таа додава дека сите треба да научат дека „Уставот и законите ја чинат секоја држава и дека демократијата има правила кои мора да се почитуваат“.
– Решенијата треба да ги изнаоѓаат оние кои за тоа го добија гласот на народот и оние кои имаат одговорност пред гласачите и сите граѓани на Косово, додаде претседателката на Косово Атифете Јахјага. (Крај)
извор: АФП фото: АП