Истанбул, 29.јуни 2015 (ИНПРЕС) – Турската полиција со водени топови и гумени куршуми ја растерала масата која вчера се собра во центарот на Истанбул на годишната Поворка на гордоста.
Сé уште не е јасно зашто полицијата се решила да ја запре поворката бидејќи ваквите паради се одржуваа и претходните години во Истанбул, и не беа проследени со големи проблеми, забележуваат медиумите. Според процените, истанбулската Поворка на гордоста е најголемиот геј настан во муслиманскиот свет.
Меѓутоа, годинава одржувањето на геј парадата се совпадна со светиот месец Рамазан, што се претпоставува ги вознемирува конзервативните муслимани во Турција.
Турската приватна новинска агенција Доган објави дека полицијата веднаш по почетокот на собирањето на масата ѝ порачала да се разотиде и дека нема да ја дозволи поворката. Според репортерот на агенцијата, изгледа дека полицијата се обидува на секој начин да спречи поголем собир во близина на историскиот плоштад Таксим, кој стана традиционално собиралиште на демонстрантите, а во 2013 година беше во центарот на вниманието во антивладините неколку неделни протести.
Хомосексуалноста во Турција не е криминализирана, за разлика до другите муслимански земји, но хомофобијата и натаму е многу раширена, коментира Ројтерс.(Крај)
извор:Макфакс фото:Макфакс
