Тирана, 27. мај 2015 (ИНПРЕС) – Српскиот премиер Александар Вучиќ пристигна во историска посета на Тирана.
– Фактот дека имаме различни ставови за одредени прашања, не значи дека не сме свесни за фактот дека двете земји играат важна улога во зачувувањето на мирот, изјави албанскиот премиер Еди Рама на прес-конференцијата при дочекот на Вучиќ.
Тој додаде дека го смета дијалогот меѓу Белград и Приштина како отворање на ново поглавје во односите меѓу Србија и Албанија.
– Сметам дека овие 24 часа ќе бидат важни за граѓаните на Србија и Албанија. Ние треба да вложиме напори да ги подобриме нашите економии, истакна домаќинот. Еди Рама изрази уверување дека двете стани ќе можат да ја извршуваат програмата за развој на регионот без граници во Западен Балкан, за отстранување на бариерите во трговијата, културата и науката.
– Се надевам дека заедно ќе одиме напред по патот кон ЕУ. Ние имаме многу заеднички нешта, кои можат да придонесат за напредокот на нашите земји, рече албанскиот премиер.
Александар Вучиќ беше пречекан со сите државни почести и со звуците на српската химна. Тој ќе има средби со претседателот Бујар Нишани, претседателот на парламентот, Илир Мета и градоначалникот на Тирана Лузим Баша.
Утре српскиот премиер ќе учествува во економски форум. Во неговата делегација е и министерот Зоран Михајловиќ, со што се потврдува дека една главните теми во преговорите ќе бидат големите инфраструктурни проекти.
Во Тирана се на сила исклучителни мерки за безбедност поради посетата на српскиот премиер. Во главниот град официјалната придружба била проследена со зголемена безбедност, вклучувајќи и надзор со хеликоптери, и полицајци на секое 50 метри од патот по кој поминува делегацијата. (Крај)
извор: АФП фото: АП