Денеска во Струга ќе се одржи традиционалната Ѓурѓовденска литија – Еордија

Струга, 7. мај 2024 (ИНПРЕС) – Моштите на свети Георгиј Победоносец и неговата чудотворна икона и годинава, денеска, на 7-ми мај, на вториот ден од празникот Ѓурѓовден ќе ја благословат Струга, со што продолжува црковната манифестацијата што традиционално се одржува секоја година.

Во храмот на Светиот Великомаченик Георгиј во Струга, претходно ќе биде отслужена ктиторската вечерна богослужба, по која ќе следи свечената Еордија (литија) со светите мошти на Великомаченикот и неговата чудотворна икона и Крнинската икона на Богородица.

Моштите на Светиот Победоносец Георгиј ќе бидат носени од четворица видни граѓани, а ќе бидат придружувани и чувани и од четворица капетани од сејменската гарда на Бигорскиот Манастир, облечени вораскошната традиционална мијачка носија, со сејменски ќостек на градите, на којшто е претставен ликот на Св. Јован Крстител. Зад сердарите ќе оди сејменската гарда, чии членови ќе бидат, исто така, облечени во традиционални мијачки носии, со ќостек на градите со ликот на Св. Георгиј Победоносец.

Во 16:00 часот ќе биде отслужена ктиторската вечерна богослужба, после што ќе следи Еордијата, што ќе започне веднаш по богослужбата во 17:00 часот. Литијата ќе тргне од храмот на светителот, ќе поминува низ централните градски улици, од другата страна на кејот на реката Црн Дрим, низ Чаршијата и повторно ќе се врати во црквата

На самиот крај на Струшката Еордија во дворот на струшкиот храм „Св. Георгиј Победоносец“, ќе следи културно-уметнички настан, а настап ќе има Ансамблот „Македонија“. (Крај)

извор: ИнПрес фото: архива