Нуркачите го исчистија езерското дно во пресрет на Водици

Охрид, 16. јануари 2023 (ИНПРЕС) – Течат подготовките за достојно одбележување на големиот празник Богојавление-Водици во Охрид.

Членови на клубот за подводни дејности „Охрид“ и нуркачкиот центар „Акватек“ и годинава го исчистија дното на Охридското Езеро кај пристаништето каде ќе биде положен Светиот крст во езерските води. Отпадот ништо поразличен од претходно, сликата за колективното ниво на култура не е подобрена. И повторно имаше шишиња, лименки, конзерви и метални предмети.

Деновиве екипи на ЈП „Охридски комуналец“ ќе се погрижат за украување на централното градско подрачје во знакот на Богојавленските празнувања.

Централната манифестација е в четврток. Богослужбите во охридските парохиски цркви ќе започнат во 07:00 часот, а во 10:00 часот од Градското пристанишете ќе биде положен Светиот крст во водите на Охридското Езеро. Заинтересираните капачи кои сакаат да бидат дел од настанот, своето учество можат да го пријават во сите парохиски цркви во Охрид.

Подготвена е богата програма и се очекува традиционалното фрлање на Светиот крст во водите на Охридското Езеро да го проследат илјадници верници. По чинот на Богојавленскиот водосвет, со почеток во 12:00 часот на Градскиот плоштад „Свети Климент Охридсаки“ предвидена е забавна програма за посетителите, со концерт на групата „Чалгија саунд систем“.

Во организација на Црвен Крст истиот ден од 09:00 до 15:00 часот ќе се одржи и традиционалната крводарителска акција во Центарот за култура „Григор Прличев“.

Чествувањата и обичаите поврзани со Водици во Охрид, продолжуваат и на 20-ти јануари со Денот на рибарите и празникот Свети Јован Крстител. Уникатната манифестација со традиционалното капење на рибарите и годинава ќе се одржи на месноста „Сараиште“ и ќе биде надополнета со повеќе културни и забавни содржини. (Крај)

извор: ИнПрес фото/видео: Клубот за подводни дејности „Охрид“/„Акватек“