Скопје, 17. февруари 2026 (ИНПРЕС) – Меѓународниот Аеродром Скопје, управуван од ТАВ Македонија ја проширува својата мрежа на дестинации со воведување на уште две нови авиолинии на Wizz Air до најголемите острови во Италија – Сицилија (Палермо) и Сардинија (Алгеро).
Од 15-ти јули стартува линијата од Скопје до Палермо, со која Wizz Air ќе сообраќа три пати неделно, секој понеделник, среда и петок, со достапни цени од 29,99 €, а од 18-ти јули започнува рутата Скопје – Алгеро, на која ќе лета два пати неделно, секој вторник и сабота со достапни цени од 39,99 €.
Летовите до двете нови дестинации се планирани како сезонски линии, односно ќе се реализираат до 11-ти и 12-ти септември.
Новите рути од Скопје до Палермо и до Алгеро претставуваат директна поврзаност со две атрактивни медитерански дестинации, познати по својата туристичка понуда, културно наследство и економско значење.
Уште една потврда за константниот раст на ТАВ Македонија е последната статистика за јануари, која покажува раст на двата македонски аеродроми. Меѓународниот Аеродром Скопје и Аеродромот Св. Апостол Павле Охрид во првиот месец од годината, заедно опслужија 289.584 патници на 2.009 летови.
Со актуелниот зимски ред на летање, на Меѓународниот аеродром Скопје вкупно 15 авиокомпании оперираат летови до 50 дестинации, додека на Аеродромот Св. Апостол Павле во Охрид, 3 авиокомпании реализираат летови до 8 дестинации.
Со почетокот на летниот ред на летање, кон крајот на март, скопскиот аеродром ќе ја прошири својата мрежа на линии со уште две нови релации – кон Будимпешта и Неапол, додека охридскиот аеродром ќе добие нова линија до Милано. Во мај, Аустријан ерлајнс ќе започне со летови од Охрид до Виена, а во јуни, Wizz Air ќе воведе уште две нови линии од Охрид до Катовице и Вроцлав. (Крај)
извор: ИнПрес фото: архива
