Охрид, 5. октомври 2023 (ИНПРЕС) – Македонскиот репрезентативец во текбол, охриѓанецот Димитар Пејчиновски го освои третото место на завршниот турнир во Јадранската текбол лига, што се одржа во Скопје.
Пејчиновски играше во пар со Радослав Митро и успееа да стигнат до полуфиналето.
Јадранската лига се одржуваше во периодот од 30-ти јули до 30-ти септември, а домаќини на натпреварите покрај Скопје беа и градовите Сараево, Бар, Задар и Златибор.
Пејчиновски во изјава за Супер радио и InPress не го криеше задоволството што успеа да оствари одличен пласман во сопствената земја.
– Пресреќен сум што успеав во Македонија да остварам пласман во полуфинале. Инаку, во полуфиналниот меч изгубивме од црногорска екипа, а турнирот го освоија српските претставници. Би сакал да упатам пофалби до организацијата на комплетната Јадранска лига и се надевам дека овој проект ќе заживее и ќе стане дел од натпреварувачкиот календар секоја година, рече Пејчиновски.
Следен предизвик за Пејчиновски е учество на Светско текбол првенство што од 29-ти ноември до 3-ти декември ќе се одржува во Тајланд. Тој се надева дека состојбата организациски ќе се среди, дека ќе се изнајдат средства за да може да отпатува и да се натпреварува рамо до рамо со светските прваци во текбол.
Во неодамнешното интервју за Супер радио и InPress тој истакна дека во Македонија за жал текболот сé уште е на ниско ниво, но состојбата полека се подобрува и во скоро време и Охрид ќе добие маси за текбол.
Инаку Пејчиновски освен за македонската репрезентација, активен е и на клупско ниво, член е на новосадскиот клуб „Лиман“, а има учествувано на 30-на турнири низ цела Европа. (Крај)
извор: ИнПрес фото: Димитар Пејчиновски
