Струга, 5. јуни 2026 (ИНПРЕС) – По повод одбележувањето на Денот на Европа, утре ќе се одржи меѓународна велосипедска тура на која ќе учествуваат околу 80 велосипедисти и дипломатски претставници.
Турата, но и останатите активности првично беше предвидена за 16. мај, но беше поместена поради временските услови.
Велосипедската рута ги поврзува Струга, Поградец и Охрид преку настан фокусиран на прекугранична соработка, одржлива мобилност и активни јавни простори.
– Поминувајќи низ три града и две држави, турата ги собира велосипедистите, институции, партнерите и гостите околу Охридското Езеро за целодневно движење и активности, велат организаторите.
Стартот на турата е пред зградата на Општина Струга (10:30 до 11:30 часот). Учесниците ќе се движат по улиците „Владо Малески“ и „Маршал Тито“ во правец кон граничниот премин Ќафасан. Во Охрид ќе бидат во попладневните часови (15:15 до 16:30 часот), а ќе се движат по булеварот „Св. Наум Охридски“, булеварот „Туристичка“, булеварот „Македонски Просветители“ и Градскиот плоштад. Потоа се враќаат во Струга во периодот од 15:45 до 17:30 часот.
Паралелно со турата, во Паркот на поезијата во Струга од 12:00 часот ќе се реализира целодневна програма за целата заедница – работилници, базар на мали бизниси, детски зони, музичка програма, друштвени игри и активности на отворено. (Крај)
извор: ИнПрес фото: архива
