Скопје, 28. јули 2022 (ИНПРЕС) – „Јас не можам да чекам“ е мотото под кое денес се одбележува 28 -ми јули, Светскиот ден на хепатитис.
Целта е да се нагласи потребата од засилување на борбата против вирусниот хепатитис и важноста од навремено тестирање и лекување, бидејќи тој е најголем ризик фактор за појава на карцином на црниот дроб.
Одбележувањето на овој ден дава гласност на оние кои се погодени од вирусен хепатитис, повикувајќи на итна акција и крај на стигмата и дискриминацијата, истакнуваат од здружението „Хепар Центар Битола“. Оттаму објаснуваат дека болестите на црниот дроб се високо на агендата на здравствените институции во нашата земја, но потребно е повеќе да се посвети внимание на обезбедување на континуитет во лекувањето и воведување на нови терапии и дијагностични процедури.
Статистиката покажува дека речиси 3.000 луѓе умираат од хепатитис Б и Ц секој ден, а на секои 30 секунди еден човек го губи животот. Навременото тестирање и лекување на хепатитис Б, Ц и Д може да спаси живот, а ако хепатитисот не се лекува може да доведе до рак на црниот дроб. Загрижувачки е и податокот дека 90 отсто од луѓето кои живеат со вирусен хепатитис не се свесни дека го имаат, затоа е важно можностите за тестирање на хепатитис да бидат подостапни за повеќе луѓе за да може навремено да се тестираат и лекуваат.
Во наредниот период фокусот на активности треба да се стави на елиминација на хепатитис Ц, имунизација и како и ставање на Позитивната листа на современи лекови за третман на хепатитис Б. Исто така треба да се подобри и да има континуитет во набавката на иновативни лекови и воведување на современа дијагностика кои се веќе одобрени во земјите на Европа и САД, соопштуваат од „Хепар Центар Битола“.
Хепатитисот е воспаление на црниот дроб. Постојат пет главни типови на вирус на хепатитис – А, Б, Ц, Д и Е. Хепатитисот Б и Ц доведуваат до хронични заболувања кај стотици милиони луѓе на глобално ниво, а заедно се најчеста причина за цироза на црниот дроб, рак на црниот дроб и смртни случаи поврзани со вирусен хепатитис.
Од 2019 година, околу 116 милиони луѓе во Западниот Пацифик живеат со хепатитис Б и 10 милиони со хепатитис Ц. Луѓето остануваат недијагностицирани и нетретирани. Во Западниот Пацифик, само 18% од луѓето кои живеат со хепатитис Б биле дијагностицирани, а 5% добиле третман. За хепатитис Ц, 25% од луѓето се дијагностицирани, а 10% добиле третман.
Овогодинешната тема, „Bringing hepatitis care, closer to you”, има за цел да ја подигне свеста за потребата да се поедностави и да се донесе грижата за хепатитис во примарните здравствени установи, во местата во заедницата и локации надвор од болничките локации, така што грижата е поблиску до заедниците и луѓето каде и да се тие. (Крај)
извор: ИнПрес фото: архива
