Скопје, 14. март 2024 (ИНПРЕС) – Во текот на вчерашниот ден направена е уште една мултиорганска трансплантација на органи во која што еден пациент доби срце, еден пациент црн дроб и двајца пациенти добија бубрези, информираат од министерството за здравство.

Додаваат дека во наредните денови пациенти од Универзитетската клиника за ортопедија ќе имаат шанса да добијат и коскени ткива.

Ресорниот министер Илир Демири упати огромна благодарност до семејството на донорот кое одлучи да ги донираат органите од нивниот близок и притоа да спасат најмалку четири животи.

– По добиената согласност во вторникот, вчера во раните утрински часови започнаа трансплантациите на срце, црн дроб, бубрези и коскени ткива. Упатувам огромна благодарност до семејството на донорот кои повторно нѐ потсетија на важноста, на емпатијата и на хуманоста и во најтешките моменти од животот. Нивната одлука денес значи нов живот за некого, од вчера спасуваме најмалку 4 животи. Дарувањето органи е највисокиот чин на алтруизам кои сите нас не прави подобри луѓе спасувајќи човечки животи. Голема благодарност и до сите медицински тимови кои овие 48 часа работат со пациентите и се грижат за нивното здравје, истакнува Демири.

Од 2020 година досега трансплантирани се 11 срца, 4 црни дроба, 38 бубрези и 24 коскено ткива, вкупно 77 органи што живот значат. (Крај)

извор: ИнПрес фото: архива