Скопје/Охрид, 12. август 2024 (ИНПРЕС) – Вчера, недела, 11-ти август, регистрирани се вкупно 45 пожари на отворен простор, од кои во моментов 10 се активни, 3 се под контрола и 32 се изгаснати, информираат од Центарот за управување со кризи (ЦУК).
– Активен е пожарот на Галичица и се шири во правец на врвот Магаро кон Стење, Охридска страна, каде гори нискостеблеста вегетација, стои во официјалната информација на ЦУК.
Додаваат дека под контрола е ставен пожарот на Илинска Планина, Плаќенска планина, на подрачјето на двете општини – Демир Хисар и Охрид, а зафатена е ниска вегетација, нискостеблеста шума и букова шума.
Изгаснати се пожарите во селото Опеница, Општина Охрид, каде беше зафатена мешана шума и во Општина Струга, селата Долно Татеши и Добовјани каде гореше ниска вегетација. (Крај)
извор: ИнПрес фото: архива
