Шојбле: Верувам дека Грција ќе ги спроведе ветените реформи

Берлин, 1. март 2015 (ИНПРЕС) – Германскиот министер за финансии Волфганг Шојбле изјави дека и` верува на грчката влада во врска со најавеното спроведување на ветените реформи.

Новата грчка влада на чело со Алекс Ципрас ја изрази својата подготвеност да ги спроведе реформите, кои имаат за цел намалување на државниот апарат и социјалните трошоци, како и зајакнување на борбата против корупцијата. Во овој поглед, Еврогрупата на 24-ти февруари ја изгласа финансиската помош за Атина во текот на следните четири месеци.

– Новата грчка влада доби широка поддршка од населението. Верувам дека грчките власти ќе ги преземат неопходните мерки за поефикасно спроведување на даночното и финансиско управување, изјави Шојбле во интервју за германски „Билд ам Зонтаг“.

Шојбле зборува позитивно и за министерот за финансии на Грција, Јанис Варуфакис и за премиерот Алексис Ципрас, нарекувајќи ги „образовани и компетентни“.

Министерот додаде дека грчката влада мора строго да ги исполнува условите поставени од Еврогрупата, истакнувајќи дека „Германија е подготвена да и` помогне на Грција во спроведувањето на даночната реформа“.

Берлин е главен кредитор на Грција, чиј вкупен долг е над 320 милијарди евра. Само во 2015 година, на Атина и` се потребни 21 милијарди евра за отплата на каматата на кредитите. Од 2008 година, како резултат на кризата, приходите на населението се намалија за 40%. (Крај)

извор: Билд ам Зонтаг фото: архива