Охрид, 19. декември 2024 (ИНПРЕС) – Каролина Гочева, Наум Петрески, Пајак и Take 5, како и диџеите Gec и Face ќе ги забавуваат охриѓани и гостите за дочекот на Нова година на градскиот плоштад во Охрид.
Општина Охрид подготви богата забавна програма по повод претстојните новогодишни празници, како за возрасните така и за најмладите. На 30-ти декември сцената на Градскиот плоштад „Свети Климент Охридски“ од 20:00 часот е резервирана за шоуто 2 Mothers Brothers на Стрезо Стаматоски и Никола Тодороски, додека за 1-ви јануари ќе настапат Сара Мејс и „Балканикос бенд“.
Туристички Охрид е украсен и со одлични најави за исполнетост на капацитетите за Нова година.Очекувањата се дека и годинава најголемиот туристички центар во Република Македонија ќе привлече бројни посетители, како од земјава така и од странство. Турските и српските гости и понатаму остануваат најбројните во Република Македонија и секако убавиот Охрид.
Покрај на Градскиот плоштад, посебна забавна програма подготвуваат и угостителите, што уште повеќе ќе придонесе за да биде исполнет градот за време на новогодишните, но и сите останати празници пред и после Нова година. Секоја година се бележи солидна исполнетост и за празникот Божиќ, Стара Нова година, како и за големиот христијански празник Богојавление Водици и Денот на рибарите. (Крај)
извор: ИнПрес фото: архива
