Охрид, 3. декември 2025 (ИНПРЕС) – Охрид и годинава со бројни настани достојно ќе го одбележи празникот Св. Климент Охридски – Патрон на градот.
Програмата започнува денес со промоција на второто издание на „Охридска археолошка азбука” од проф. д-р Антонио Јакимовски, археолог, д-р Елизабета Томевска-Илиевска и м-р Маја Јаневска, педагози и м-р по археологија Иван Малезанов, што ќе се одржи во големата сала на Општина Охрид со почеток во 12:00 часот.
Утре од 11:00 часот во големата сала на Општина Охрид ќе се одржи промоција на книгата „Григор Прличев- вчера денес и утре” од Милчо Јованоски и НУ Библиотека „Григор Прличев”, а промотор ќе биде проф.д-р Зоран Тунтев. Од 12:00 часот во Култ Културен центар ќе се одржи настанот „Букви и зборови што создаваат светлина: Јазична работилница посветена на Свети Климент Охридски“ од Кристина Дукоска – основач на „Правопис за деца”. Вечерта од 19:00 часот е осмодекемвриски концерт на учениците од ОМУ „Методи Патче” во концертната сала на училиштео, а од 19:30 часот во Центарот за култура „Григор Прличев“ е свечена приредба на ООУ „Св. Климент Охридски”.
На 5-ти декември од 11:00 часот во големата сала на Општина Охрид ќе биде промовирана книгата „Охридски летопис книга втора” и „Охридски летопис комплетно издание” од авторите проф. Д-р Павле Митрески и м-р Димитар Смилески, а промотор ќе биде проф.д-р Ѓорѓи Тоноски. Од 12:00 часот во Спомен куќа на Робевци ќе биде отворена изложбата „Прстенот – симбол на завет, статус, моќ“ од етнолошката ризница на охридскиот музеј.
Во 19:00 часот во изложбениот салон на Центарот за култура ќе биде отворена традиционалната осмодекемвриска изложба на „Охридскиот фото клуб”, а од 20:00 часот на големата сцена е свечената приредба на СОУ „Св. Климент Охридски”. Во истиот термин на плажата „Кадмо” ќе се одржи и концертна промоција на ВИС „Билјана” – Охрид во чест на Свети Климент Охридски – Патронот на Охрид.
Сабота на 6-ти декември од 18:00 часот во Центарот за култура е отворањето на изложбата насловена 365 дена творештво на бакар од охридската уметничка Маја Чифлигароска и Копер краф – MAM, а во 19:00 часот во големата сала на Општина Охрид ќе биде прикажан краткометражниот документарен филм „Обичен херој” (автор и режисер Јован Цветкоски).
На 7-ми декември од 12:00 часот во Центарот за култура ќе се одржат Регионални смотри на СОФАМ – Фолклорна смотра на ансамблите од Југозападен регион во чест на Свети Климент, во 18:00 часот е отворањето на самостојната изложба на уметнички слики од охридската уметничка Јана Маркоска – Наумовска насловена „Мечта” во галерија „Охридска порта Љубица”.
Во понеделник, на денот на празникот во 10:00 часот е предвиден поклон пред моштите на Свети Климент Охридски во манастирот „Свети Климент и Пантелејмон”- Плаошник, во 11:00 часот полагање свежо цвеќе на споменикот на Свети Климент Охридски во ООУ „Свети Климент Охридски” (училишен двор), во 12:00 часот полагање свежо цвеќе на момументалниот споменик на Свети Климент Охридски на градскиот плоштад и врачување награди на најдобрите поетски творби на наградниот ученички литературен конкурс по повод Патронот на Охрид на Градски плоштад „Свети Климент Охридски”. Вечерта од 18:00 часот ќе биде отворена изложбата на фотографии „Охридско секојдневние” од охридската фотографка Нина Ангелоска во Куќа на Уранија.
Свечената академија по повод 8.Декември – Денот на Свети Климент Охридски – Патрон на Охрид ќе се одржи во катедралната црква „Света Софија“ со почеток во 19:00 часот. (Крај)
извор: ИнПрес фото: архива
