Охрид, 4. јуни 2026 (ИНПРЕС) – Минатата година во Охрид биле склучени 253 бракови, а регистрирани се 105 разводи.
Според податоците на Државниот завод за статистика, 233 невести склучиле прв брак, 18 втор и 2 трет и повеќе, додека пак 232 младоженци склучиле брак по првпат, 20 по втор и 1 по трет пат и повеќе.
Од вкупно 105 разводи најголемиот дел настанале кај возрасната група од 40 до 49 години на сопругот и сопругата.
Колку за споредба, во 2023 година биле склучени 335 бракови, а имало 65 разводи, додека во 2024 година судбоносното „да“ го кажале 243 двојки, а регистрирани се 62 разводи. Лани забележителен е драстичен скок во бројката на разводи.
На државно ниво во 2025 година се склучени 10 507 бракови и во споредба со претходната година нивниот број е намален за 5.1 %, а имало 2.185 разводи.
Најмногу бракови, 1.362, се склучени во месец август, а најмалку во месец март,473. Најчесто е стапувањето во прв брак со учество од 92.8 % за жените и 92.1 % за мажите. Во втор брак со учество од 7.1 % и во трет брак со учество од 0.8 %, во вкупниот број склучени бракови, почесто стапуваат мажите. Просечната возраст при склучувањето прв брак е 27.5 години за невестата и 30.2 години за младоженецот.
Во 2025 година, според возраста, најмногу бракови биле склучени во старосната група од 25 до 29 години, односно 3 448 или 32.8 % кај жените и 3 750 или 35.7 % кај мажите. Според возраста, најголем број разводи имало во старосната група од 35 до 39 години, од кои 400 или 18.3 %, кај жените и 381 или 17.4 % кај мажите. Според траењето на бракот, најмногу разводи, 478 или 21.9 %, се случиле од 5 до 9 години по склучувањето на бракот. (Крај)
извор: ИнПрес фото: ИнПрес
