Пустец, 3. септември 2014 (ИНПРЕС) – По одлуката на албанскиот парламент за донесување на нов Закон за територијална поделба, претставниците на македонското и на грчкото малцинство најавуваат жалби пред Уставниот суд на Албанија за враќање на нивните општини.
Законот за територијалната поделба е изгласан без присуство на опозицијата. Со новиот закон останува само една македонска општина и тоа Пустец. Македонците бараа трите општини во областа Голо Брдо, Стеблево, Острени и Требиште да се обединат во една која би се викала Голо Брдо. Се бараше и општините Запот, Шиштавец и Топојан во областа Гора да се обединат во една општина Гора. Овие предлози не беа прифатени.
И Македонската алијанса за европска интеграција и претставниците на грчкото малцинство се договараат за заеднички настап, за поднесување на заедничка жалба пред Уставниот суд. Според Македонската алијанса со новиот закон не се почитува Рамковната конвенција за националните малцинства.
Против новата територијална поделба е и Заедницата на локалните единици, која бара да има од 80 до 100 општини, а не 61 колку што се предвидени со законот. Досега во Албанија имаше 373 општини. (Крај)
извор: МКД.мк фото: архива