Белград, 11. декември 2015 (ИНПРЕС) – Шефот на српската дипломатија Ивица Дачиќ изјави дека не гледа причина за забелешките на Македонија во врска со таблата со ознака „БЈРМ“ поставена на делница на Коридорот 10, пренесуваат српските медиуми.
– На нив сега им пречи таа табла, а нам не треба да ни пречи тоа што во Унеско гласаа за прием на Косово?, праша Дачиќ.
Српскиот министер за надворешни работи истакна дека овие аргументи ги изнела и амбасадорката на Србија во Скопје, на средбата во македонското министерство за надворешни работи, каде ѝ бил пренесен устен демарш поради поставувањето на таблата.
Министерството го образложило својот протест со тоа што Србија Македонија, иако во Обединетите нации се води под ознаката „ПЈРМ“ (FYROM), ја призна под уставното име Република Македонија.
Поради тоа Македонија бара ознаката „граница са БЈРМ“, која осамна на таблата за податоци за изведувањето на работите на патот Владичин Хан – Доњи Нерадовац, да биде итно отстранета.
Дачиќ, меѓутоа, категорично порача дека таблата останува. (Крај)
извор: мкд.мк фото: архива