Заседаваше Кризниот штаб на општина Охрид: Организаторите на музичките настани да не ги одржуваат истите ако немаат капацитети за спроведување на протоколите

Заседаваше Кризниот штаб на општина Охрид: Организаторите на музичките настани да не ги одржуваат истите ако немаат капацитети за спроведување на протоколите

Охрид, 29. јули 2020 (ИНПРЕС) – Кризниот штаб на општина Охрид денеска одржа состанок на кој покрај постојаните членови, присуствуваa и претставници на Подрачната единица на Државниот пазарен инспекторат, Подрачната единица на Управата за јавни приходи и Подрачната единица на Државниот инспекторат за труд.

На состанокот беа донесени следните заклучоци:

– Поради зголемениот број на посетители во Охрид и во пресрет на продолжениот празничен викенд, инспекторите на државните инспекторати, заедно со екипи на Инспекторатот при општина Охрид ќе спроведуваат заеднички и координирани контроли и ќе вршат инспекциски надзор на плажите, угостителските и сместувачките капацитети, во делот на почитување на законските прописи за поставување на урбана опрема и почитување на протоколите за превенција од Корона вирусот – COVID-19;

– Поради најавите за организација на бројни музички настани на повеќе локации на отворено, на кои се очекува да присуствуваат голем број на посетители, Кризниот штаб на oпштина Охрид упатува препорака до организаторите да не ги организираат и одржуваат настаните, доколку немаат капацитети за почитување и спроведување на „Протоколот за начинот и условите за организација на настани“, кој го донесе Владата на Република Македонија. Исто така, се упатува препорака и до сопствениците на локации на кои се закажани овие настани, да не ги изнајмуваат локациите за организација на музички настани од масовен тип, доколку не постојат услови за почитување на одредбите од овој Протокол;

– Во тек се активности во делот на зголемување на капацитетите на Општата болница во Охрид, при евентуален поголем прилив на заразени од COVID-19. Според најавите, ќе биде поставена монтажна модуларна болница со капацитет од 40 легла, со целокупна опрема. Во текот на наредниот период, службите на општина Охрид ќе започнат со подготвителни градежни активности во кругот на болницата. Ќе се работи на тампонирање на просторот каде што ќе бидат поставени објектите и ќе се врши асфалтирање на дел од улиците во болничкиот комплекс;

– Поради зголемениот број на туристи во градот, Општина Охрид деновиве ќе спроведе Кампања за подигување на јавната свест во делот на почитување на мерките за заштита и превенција од Корона вирусот COVID-19, која ќе се одвива на повеќе јавни локации и на социјалните мрежи;

– Се упатува препорака до трговците, угостителите, хотелските и сместувачките капацитети да ги почитуваат сите протоколи за работа во текот на наредниот период;

– Се упатува препорака до жителите на Охрид и туристите кои во моментот престојуваат во градот, максимално да ги почитуваат сите мерки за заштита и превенција од Корона вирусот COVID-19: да се носат заштитни маски; да се одржува потребна дистанца и да се одржува лична хигиена. (Крај)

извор: Општина Охрид фото: ИнПрес