Охрид, 7. април 2025 (ИНПРЕС) – Проолжува да се зголемува водостојот на Охридското Езеро, но и понатаму е далеку од просечниот за овој период од годината.

Според денешните мерења на УХМР водостојот е на кота од 693,29 м.н.в што е за 28 сантиметри под просекот за овој месец (693,57 м.н.в) и 19 сантиметри над минимално дозволената кота (693,10 м.н.в). Температурата на езерската вода, измерена утрово е 8 степени и е за 2,3 степени пониска од просечната.

Последнава седмица езерското ниво е покачено за 4 сантиметри, додека во изминативе две за 10 сантиметри.

Професорите Владо Спиридонов и Ивица Милевски од Природно-математичкиот факултет во Скопје предвидуваат дека со продолжените врнежи можно е зголемување на нивото на Охридското Езеро.

Со надеж дека одговорните ќе преземат соодветни мерки и нема да ни се случи „Преспанизација“ на Охридското Езеро, на OhridPress продолжува рубриката „До кај сме“ каде секој ден објавуваме по една фотографија од истата локација од процесот на претворање на охридското „Островче“ во полуостров.

Во Охрид денес променливо облачно и студено време со сончеви периоди. Ќе дува умерен до засилен ветер од северен правец (над 70 km/h). Максималната температура ќе се искачи до 5. степени.

– Денеска ќе дува засилен северен ветер (над 70 km/h), а наместа ќе има услови за провејување на слаб снег. Потоа во следните денови времето ќе биде стабилно и ветровито со температури под просекот за овој период од годината. Утринските температури на повеќе места ќе бидат негативни, а дневните во постепен пораст, информираат од Управата за хидрометеоролошки работи на Република Македонија (УХМР). (Крај)

извор: ИнПрес фото: ИнПрес/УХМР