Охрид, 3. март 2025 (ИНПРЕС) – Нивото на водата во Охридското Езеро и понатаму е далеку од просекот за овој период од годината.
Според денешните мерења на Управата за хидрометеоролошки работи на Република Македонија (УХМР), езерото е на кота од 693,15 м.н.в, што е за 34 сантиметри под просечното ниво за овој месец (693,49 м.н.в) и само 5 сантиметри над минимално дозволената кота (693,10 м.н.в). Температурата на езерската вода, измерена утрово е 7 степени и е за 0,6 степени пониска од просечната.
Од втората половина на јануари забележливо беше речиси секојдневно намалување на нивото на водата во Охридското Езеро, истото беше забележливо и во текот на февруари, а сега речиси две недели стагнира на кота од 693,15 м.н.в.
Со надеж дека одговорните ќе преземат соодветни мерки и нема да ни се случи „Преспанизација“ на Охридското Езеро, на OhridPress продолжува рубриката „До кај сме“ каде секој ден објавуваме по една фотографија од истата локација од процесот на претворање на охридското „Островче“ во полуостров.
Во Охрид денес променливо облачно со услови за сончеви периоди. Ќе дува слаб до умерен ветер од северен правец.
Максималната температура ќе се искачи до 8. степени.
– Следува период на стабилно време со пониски утрински температури, а дневните до крајот на работната недела ќе бидат во постепен пораст, информираат од Управата за хидрометеоролошки работи на Република Македонија (УХМР). (Крај)
извор: ИнПрес фото: ИнПрес/УХМР
